傻傳道的山水部落

萬興教會設教六十週年慶典祝詞

王牧師，列位兄姐，大家平安：

        感謝王牧師以及咱萬興教會的好意邀請，互牧師可以有這個機會代表咱的母會溪湖教會向咱來恭喜，祝賀咱萬興教會佇今仔日慶祝設教六十週年的喜慶。

         今仔日咱啲慶祝成立六十週年禧慶，母會自然有說不出的歡喜，因為看見自生產落地生根生湠經過六十個寒暑，見證眾信徒愛主所付出的一切，並沒有白了工，因為上帝的家祂會親自牧養，雖經過艱難困苦，但主恩典夠用，因此，咱回頭觀看，就有說不盡的感謝，因為主疼惜咱萬興教會。

         萬興教會是呼召罪人悔改認罪的所在，是上帝施行憐恤、赦罪、救贖、成聖的所在，來到主面前，人的生命欲得著更新，也得著豐盛的生命，信徒欲因為牧師盡心盡力的經營與付出，來學習著疼主疼人的信仰生命，同時，長執與信徒之間也因為同心合意，彼此相疼的生活見證，致到互福音得著廣傳，互咱的教會得著成長。

         申命記三十二章7節：「你著記得古早的日，數念歷代的年；問你的老父，他欲指示你；問你的老大，in欲ka你講。」是的，這六十年來有多少聖徒以及信仰的前輩，in為著教會付出一切，心甘情願為上帝國來打拼，無惜將自己獻上，為主所用，這個過程豈采有打擊、打衝擊、有灰心失志、有流目屎的時，但是倚靠主的恩典，主耶穌聖手的扶持帶領，祂帶領咱經過曠野無水之地，到了青翠的草埔，祂chhoa7咱到安靜的水邊。越頭來看，真正可以看見上帝的鴻恩大愛憐憫咱。

         當咱迎接設教一甲子60週年的時，咱必須重新立志，重新裝備咱自己，若安呢，咱裝備的目的是什麼？「就是要傳福音」！這好親像主耶穌對彼得所說的一句話：「你欲得著人」。所以咱的焦點是人，是有需要的人，是靈魂失喪的人，咱著去得著人。在這個時代，咱若要得著人，就著要將咱的主權交互上帝，將權力放下。互咱的上帝，佇咱中間做萬權能的上帝！今仔日，主向咱每個人發出挑戰，佇邁向一百週年的時，咱是呣是願意互上帝的主權來治理咱？降服咱？互這所在因為上帝的治理，來變成做「地上上帝國」！

         主耶穌互咱兩條命令，一條是在教會內遵行的，一條是在教會外遵行的。對內的命令是彼此相愛，「恁若相疼，眾人欲對安呢知，恁是我的學生。」（約十三35）對外的命令是到普天下去傳福音，這是主的命令，所以咱要傳福音。（馬太福音廿八18～20）

         列位兄姐，為著紀念慶祝六十週年，邁向未來的一百週年，母會站佇信仰共同體的見証，母會願意與咱做伙將古早時代留落來的信仰精神發揮、延續，「蕃薯soan藤做母子，散葉生湠親兄弟！」

         上帝通過先知耶利米說：「我欲互in it心it路，互in常常敬畏我，互in及in的子孫得著福氣。....我欲歡喜in，賜福互in，我實在欲盡心盡意栽培in佇此個所在。」（耶利米卅二39，41）盼望咱對今以後，著憑著這個理念向前邁進，相信會帶給咱一顆火熱的心，忠心盡心來服事主，願一切榮耀歸互上帝，從今直到永遠。阿們！