在佇上帝萬事攏會 @ 傻傳道的山水部落

聖詩：73、317、512

啟應文：28

經文：創世記十八1～15；馬太福音十九25～26

題目：在佇上帝萬事攏會

時地：2008.07.27

列位親愛兄姐，願恁平安：

壹、前言：

美國短距離賽跑的名將葛林，佇雅典世界運動會內面，創造人類百米賽跑的世界新紀錄～九秒79。今，九秒79的成績豈會成做咱人百米賽跑最後極限呢？後來，佇去年的義大利賽跑，牙買加選手鮑威爾走出九秒74的世界記錄，沒想著才過無一年久的時間，這個新記錄就互同國的選手波特，佇美國紐約田徑大獎賽男子100公尺決戰，以9秒72改寫他的同胞鮑威爾的9秒74世界紀錄、閣拿著冠軍，如果九秒72呣是咱人速度的極限，安呢，走100公尺的體能極限到底佇叨？人類的體能豈真正是無極限嗎？我想，應該是有，無極限的是自古以來就已經存在佇咱人中間的「夢想」。只要人不放棄「夢想」，奇蹟就不斷佇人的歷史中發生。

說著人，咱知，台灣的原住民in是太平洋南島民族其中的一支族，南島民族佇五千多年前就已經分佈佇太平洋三分之二的島嶼，成做世界尚gau5航海，分佈上寬的民族。佇五千多年前，南島民族為什麼有力量，用簡陋的獨木舟行出這麼寬闊的世界？文化人類學家的回答只有一個：就是「夢的力量」。因為佇南島民族的神話故事內面，認為人的最高價值就是勇敢向茫茫渺渺的大海航海，因為in知，海的另外一邊就是「天堂」。

列位，佇咱體內的血，咱有一部份嘛是遺傳著南島民族的基因，照理說，咱台灣人應該也是很有夢想的一個民族，總是bo tu-tu，有日本政治評論家說：「恁台灣人連作夢的勇氣叨無，恁攏尚緊放棄自己的夢想。」原因佇叨？台灣人：1.安於現狀。2.欠缺自信。3.短視近利（chhu3-bang2閣喫緊粿）。豈采，這也就是造成台灣人自我毀滅的三大因素。

列位兄弟姐妹，自咱細漢的時到大漢成人，甚至已經邁入老年，「佇咱的一生當中，咱有夢想嘸？咱是不是曾編織一個屬於咱自己的夢？閣也希望可以完成它？」

牧師是佇屏東教會的一個散赤單親家庭長大的，體會著一個婦人不時要為著四個囝仔的吃穿teh走chong，teh煩惱，所以佇19歲之前，牧師的夢想是欲讀大學，畢業後賺大錢做好額人來回報我的母親。bo打算，19歲那年看見異象受上帝呼召來獻身，牧師的夢想卻是變做幫助有需要，想欲成長的教會，無論是弱小教會或者是大教會～攏通成做一個健康的肢體、會成長的教會。健康的教會oe宣教、會成長；健康的肢體會團結、合一，會互相協調，更加會為主做工，來興旺福音，完成主耶穌所交託咱的宣教大使命。

佇剛才咱所讀的創世記十八1～15可以閣再參考之前的十七15～22的經文，咱可以看見有一對老人，in並沒有任何的夢想，佇in的人生中，豈采，也是嘸通閣再望啥。in真富裕、奴僕女婢很多、牛羊歸群，是當時的人眼中勢力極其強盛的族長。佇亞伯拉罕年老的時，也有他和他的女婢所生的子來繼承他所有的產業，照風俗來說也是子承父業。人生到這號空cham，看起來好像是很完滿，總是，咱若看經文會發現佇亞伯拉罕的心內還是猶有一點仔遺憾～他和撒拉年老無子。創世記的作者用第一人稱的方式描寫老人的吐氣說：「一百歲的人猶會生子嗎？撒拉已經九十歲，猶會生養嗎？」另外也用第三者的角度來看亞伯拉罕的絕望：「亞伯拉罕及撒拉年歲已經老，撒拉的月經已經絕。」當撒拉佇布棚的後面偷偷聽見上帝的應允時，soa2笑出來說：「我已經soe-lam2，我的主亦老啦，豈猶有此號的歡喜？」設使若無上帝特別的恩待，應允欲互撒拉生一個子，我想亞伯拉罕與撒拉豈采會帶著這種遺憾終其一生。就因為上帝的應允，互亞伯拉罕帶來夢想及盼望。有影，欲實現夢想，若無上帝的參與，太會成就？

當耶穌的學生聽見耶穌說「富人入天國奧啊」，soa大gong5-ngiah，問主耶穌說：「若是安呢就是誰會得著救啊？」主耶穌就應說：「在佇人是boe-oe，在佇上帝萬事攏會。」

是啊，「在佇上帝萬事攏會」，對牧師來說，「傳福音，引導人歸主」是一個理想，所以當牧師猶佇神學生的時代，牧師與我的同學王清隆牧師阮二人看見台南土城教會的弱小與需要，就下定心願欲去幫助in得著成長，後來，牧師與牧師娘二人佇彼真正去經驗著，從無到有，對有到倍加閣再倍加的成長，有影，「在佇上帝萬事攏會」。所以無論是佇任何一個所在的牧會工作，無論是遇著多大的建堂的挑戰、募款的挑戰、宣教成長的挑戰，牧師相信「在佇上帝萬事攏會」。若是安呢，當咱教會欲邁向另外一個設教「百週年」的時，咱欲怎樣來邁開大步向前行得著成長呢？牧師欲用一些時間通過今早起的經文，與咱做伙來分享幾項事。

一、好款待人

創世記十八1～15，作者用一半的篇幅來描寫，亞伯拉罕與上帝之間親密的關係。當亞伯拉罕遠遠看見上帝與二個使者來的時，就phak佇地裡來迎接上帝，閣用上大的熱誠與謙卑來款待上帝。亞伯拉罕怎樣做？捧水互人客洗腳，請人客去樹仔腳歇睏，然後自己去牽一隻上好的牛仔子來刣，也做上好的餅互人客來用。最後自己竟然是站佇人客的身邊，互人客來享受這些好料。亞伯拉罕主動接待人客，閣用慷慨、細膩、熱誠、謙卑、尊重的態度來好款待他的主，也是他的朋友的上帝。

其實，欲互人得著感動來信主，實在是無什麼撇步，咱若看過咱教會百週年紀念冊，豈采咱會發現咱上主動、上熱誠去接觸人引導人、閣也願意用謙卑、尊重的態度順服教會牧師及長執的帶領，這就是信徒成長上多的時刻。換一句話說，如果咱欲邁向另外一個百週年，安呢豈采咱得愛先學會曉好款待咱的厝邊、咱的社區住民、甚至是咱的兄弟姐妹、長執、牧師。列位親愛兄姐，有想欲成長嘸？有想欲得著恩典嘸？呣通忘記，著先好款人。

二、誠實面對咱自己的有限

創世記的作者用第一人稱的方式描寫老人的吐氣說：「一百歲的人猶會生子嗎？撒拉已經九十歲，猶會生養嗎？」也用第三者的角度來看亞伯拉罕的人生：「亞伯拉罕及撒拉年歲已經老，撒拉的月經已經絕。」當撒拉佇布棚的後面偷偷聽見上帝的應允時，soa2笑出聲說：「我已經soe-lam2，我的主亦老啦，豈猶有此號的歡喜？」無論是亞伯拉罕或者是撒拉，佇in年老的時，放佇in心中的陰影是～絕望。一個是一百歲，另外一個是九十歲，已經是過生育的年齡，台語說：「阿婆仔生子～真拼！」莫怪老尪老某二人聽見上帝欲應允in一個子，二人攏笑出來，二個老人的年歲加起來也將近欲倚二百歲啦，太有可能閣生子？

咱呢？咱豈會生子？咱豈會生湠？咱豈會帶人信主？阿是說，豈有人因為咱的好所行，好見証來信主？其實，只要是人，沒人是完美的，人也會陷落佇無理性、無感情、絕望、憂悶、驚惶等種種的負面情緒與環境內面。亞伯拉罕安呢，主耶穌的學生安呢，咱嘛是安呢。但是，咱豈會想欲互這些負面情緒、歹的環境將咱限制tiau5咧？我相信咱一定呣愛，著嘸？

三、在佇上帝萬事攏會

人的有限性，有時會互人自己拿來做藉口，做無欲參加禮拜的理由，做無欲服事、無欲成長的理由。總是，上帝的要求卻呣是安呢。上帝ka亞伯拉罕說：「豈耶和華有做boe來的事嗎？」主耶穌的學生也有那款驚惶與gong-ngiah：「若安呢，是誰會得救啊？」主耶穌卻是應說：「在佇人是boe-oe，在佇上帝萬事攏會。」安呢也就是說，咱需要拓展咱的心，開闊咱的眼界，放大咱對上帝的信心，互咱用單純的信心來倚靠上帝，互上帝將祂的恩典從天頂拼落來互咱，來成就上帝美好的旨意。

看咱教會，1949～1950二年，咱教會無牧師，呣閣，咱卻是完成在人看是不可能的事，楊太平長老做見証寫說：「教會有一段時期無牧師，但是上帝，特別的眷顧與恩賜，賞賜教會完成二件大代誌，就是1949年分設萬興教會，分會員36名，1950年分設萬豐教會，分會員34名。哈利路亞，感謝主，謳咾主。」自1898年咱設教到今，咱分設萬興、萬豐、梧鳳（1956），萬興閣分設新水（1959），對咱的歷史來看，咱「真gau生湠」「真gau引導人信主」，五十年前咱可以做到安呢的大宣教行動，當然，五十年後，當咱用信心仰望上帝的時，相信上帝也欲為咱成就祂至偉大的神蹟，閣再通過神蹟奇事來顯明上帝～豈有做boe來的事嗎？