欲來的是你嗎？ @ 傻傳道的山水部落

聖經：路加福音七18～35

題目：所欲來的是你嗎？

列位親愛兄姐，大家平安：

壹、前言：

今早起，當牧師開車從台南出發的時，天猶未光。牧師早起四點半起床，洗面了就行到阮灣裡教會的厝頂，猶未五點，天猶未光，向東看你可以看見遠遠的86號東西向快速道路，閣卡可以看見遠遠的左鎮鄉與南化鄉，舉目可以看見東方的星teh sih，非常的水。Khia 佇台南市南區喜樹、灣裡、以及高雄縣茄萣鄉附近上高的地標～灣裡教會的厝頂，牧師真愛佇彼聽著海湧的聲等待天光，也佇等待天光的時，佇彼祈禱。牧師向牽我的手的主祈禱說：「主啊，你所互我看見的異象的最後三分之一是佇叨位啊？無論是佇任何一個所在，願主上帝你的旨意與你互我看見的異象成就佇你的奴僕的身上。」自牧師對1984年看見異象來獻身到今，第一個異象～就是九二一的大地動～上帝已經成就啦。那一年牧師佇彰化、南投、埔里三個所在走來走去，幫助自己的親人也鬥相工救災的工作。1999年的九二一大地動了後，牧師佇埔里災區祈禱上帝，第二個異象欲佇叨實現啊？求主牽我！後來，上帝逼使牧師回去我的阿公阿嬤khia-khi的所在～台南市的灣裡，佇彼參與上帝的手所施行的神蹟～佇人看做迷信的所在，佇建堂經費欠一半以上的情形之下，憑著信心，起造灣裡教會的新聖殿，閣還是憑著信心，經驗信徒的成長、教勢的成長。感謝上帝的恩待與帶領，也互牧師佇今早起可以站佇咱教會的講台頂，與咱眾兄弟姐妹做伙分享，上帝惦佇咱身上的神蹟奇事與恩典。

剛才咱所看的聖經節，可以看見受關監失落自由的行洗禮約翰的心情，特別是行洗禮約翰說：「所欲來的是你嗎？阿是阮著盼望別人啊？」平平同款是teh受苦，約伯將他受苦的心情寫落來，他說：「我等候耶和華，我的心神teh聽候；佇祂的話我有盼望。我的心神聽候主，比守更的人，聽候天光卡切，比守更的人，聽候天光卡切。」（詩一三○5）

什麼是「等候」？「等候」這個希伯來字常常也翻譯做「盼望」，原來的意思是「一條由好幾股的粗線kap做伙的繩仔」，抓tiau它必然會得著保全性命，萬無一失。所以這句閣通翻譯做「我得確欲an5-an5抓tiau5上帝」。對「等候」「盼望」到所等候、所盼望的得著實現，豈采是一條很長的道路，也是一段很久的時間。特別是當人佇受苦的當中，一點點的時間也會被放大變做若像是度日如年那款的艱苦久長。這就是坐監的行洗約翰的心情。「基督太猶未來？」「基督若已經來，是安怎我猶閣teh受苦？猶teh坐監？」「基督是安怎無欲施行公義的作為？是安怎無欲施行審判？」路加福音的作者，通過行洗禮約翰的心情，也描寫出初代教會信徒受盡苦楚的心情。今早起咱無欲過度強調那款的受苦心情，畢竟，基督已經來啦，所以牧師欲與咱做伙分享到底主耶穌佇這段經文內面，欲ka咱兄弟姐妹啟示什麼？

第一、耶穌基督是你所等候所盼望的主嗎？

當你看著「耶穌」的時，叨一個字出現佇你的心中？是彌賽亞？是以馬內利？或者你想著活命的餅？想著作木仔的子？想著拿撒勒人？想著上帝的羊羔？和平的人君？萬王的王、萬主的主？世間的真光？大牧者？

Max Lucado牧師佇「慈悲的救贖主」這本書內面，他說，佇聖經內面，有超過800個名稱是teh講起著「耶穌」。另外，佇他所寫的「上帝行過人間」這本書內面，他也提醒咱，單單「耶穌」這個名，佇聖經內面就出現六百多次。希伯來文「約書亞」「耶書亞」這些名翻譯作希臘文就是「耶穌」。無論是耶穌、或者是約書亞，這佇當時來說就若像是菜市場名安呢的普遍。耶穌，一個拿撒勒小所在的人，一個做木仔的子，一個單親家庭大漢的囝仔，一個無背景也無好額的人，如果，聖經的作者無提起祂是上帝的羊羔、是真理、道路與活命，安呢的一個「耶穌」，是你所等待的嗎？

行洗禮約翰受關監的時，心內真ut卒，就叫他的學生去問耶穌說：「所欲來的是你嗎？阿是阮著盼望別人啊？」事實上，病痛的、受苦的和貧窮的，他們都經驗到上帝的大能，和聽聞福音。這裏有一點，是很少人發覺的～～這並不是約翰所期待所盼望的答覆。如果耶穌是上帝揀選的那位，約翰會期待祂如此說：『我的軍隊已結集成軍。羅馬政府的中心該撒利亞，已面臨滅亡。罪人要被除去，審判正要開始。』他打算耶穌會說：『上帝的大受氣teh欲降臨。』但耶穌卻說：『上帝的憐憫臨到這裏。』當咱想說，叨位的痛苦得到安慰，愁煩轉為喜樂，苦難和死亡遭遇到挫敗，叨位就是上帝的國。耶穌的答案是：『回去告訴約翰，上帝的愛就在這裏。』（太十一3）古早時代，猶太人出現歸若個「民族英雄」，到耶穌的時代，猶原有那等號的人，即使是行洗禮約翰他也是放安呢的盼望，若是安呢，如果耶穌現在就佇咱的中間，你欲盼望祂什麼？

第二、盼望所欲來的～來顯明咱的人生價值

有一個人名叫做亞當，他是一個睛瞑五十一年久的人，他看不見任何物件，51年久攏活佇黑暗的世界。有一天，他看見了。一位醫術高明的外科醫師ka他動手術，互亞當51年來第一次看見光明。他歡喜tiau5跳kah擋boe7 tiau5就說：「我做冥夢嘛無想著黃色竟然是這麼的……黃，我竟然會通看見飛機從空中飛過，我竟然可以看見日出和日落。恁豈知，這是何等的美妙啊！」

有影，睛瞑仔看見光明。因為看見，互他對人生有閣卡深的體會。同款，對嘴乾的撒瑪利亞婦人來說，耶穌是活命的水；對猶太人的官尼哥底母來說，耶穌是上帝彼來的先生；對撒該來說，耶穌是貴氣的人客，是他的至好朋友；對常常犯錯的彼得來說，耶穌是主，是基督。對佇將耶穌釘佇十字架的百總來說，眼前受釘的是「果然是上帝的子」、「真正是義的人」！。

列位兄姐，這些名，欲ka咱講起in與主耶穌的關係，以及耶穌佇in的人生中的意義與價是什麼。所以耶穌應行洗禮約翰的學生說：「恁著去，將恁所看見所聽見的報約翰知，就是睛瞑的看見，跛腳的行，thai2-ko的清氣，臭耳人的聽見，死的人復活，喪鄉人得著聽福音，見若無佇我來著tak的，有福氣！」（路七22～23）

列位親愛兄姐，主耶穌這句話欲ka咱提示什麼？主耶穌來到世間，並呣是欲帶來政治的作為，並呣是欲帶來耶和華的審判，反轉，主耶穌來，是為著欲互人成做「健康的人」、成做「聽福音來得著救，得著福氣的人」，豈呣是呢？對咱教會來說，這就是咱教會上界要緊的「中心價值」或者是管理學大師彼得．杜拉克說的「核心價值」。教會一旦若喪失安呢的核心價值，準有閣卡好的硬體設備，嘛是了然。對咱在坐兄姐來說，請咱回頭來看咱自己，你如何稱呼「耶穌」呢？耶穌佇你的人生內面，產生什麼款的意義？產生什麼款的人生價值？阿是人生的盼望？耶穌，豈有帶互你與別人不同的一面？這個不同的一面所呈現出來的生活內涵是什麼？列位，你的心、你的期待，會反應佇你對佇耶穌的稱呼頂面。

最後，耶穌祂將盼望放佇咱的身上！

耶穌用祂的行動來証明、來宣告祂的時代已經來臨，同時，主耶穌也肯定行洗禮約翰偉大的所在，總是閣卡要緊的是，主耶穌肯定那些惦佇上帝國內面至微細的比行洗禮約翰猶閣卡偉大。行洗禮約翰teh問講：「所欲來的是你嗎？阿是阮著盼望別人啊？」總是主耶穌卻是將這款的被動、迷惑、驚惶的心境，轉化做積極、主動的期待。就是說，若欲將未來放佇錯誤的期待，阿是對人的誤解頂面，卡輸人聽見福音得著救贖，然後成做一個實現上帝旨意的人，我想這就是主耶穌對咱的盼望與期待。

列位兄姐，呣通問我，所欲來的是你嗎？牧師卡愛咱問咱自己，當咱得著救了後，是否咱也成做實現上帝旨意的微細器具呢？願上帝賜福咱眾人。